Հայտնի են Գրքի երևանյան միջազգային ութերորդ փառատոնի հաղթողները

ՀՀ կրթության, գիտության, մշակույթի և սպորտի նախարարության Գրքի երևանյան միջազգային ութերորդ փառատոնն ամփոփվել է Հակոբ Պարոնյանի անվան երաժշտական կոմեդիայի պետական թատրոնում տեղի ունեցած մրցանակաբաշխությամբ:

Հայտարարվել են «Սարոյան» միջազգային մրցանակի և ազգային գրական մրցույթի հաղթողների անունները։ Գրական մրցույթի «Դրամատուրգիա» անվանակարգում հաղթող է ճանաչվել Անի Առաքելյանը, «Պոեզիա» անվանակարգում՝ Մհեր Արշակյանը, «Մանկապատանեկան գրականություն» անվանակարգում՝ Կարինե Հայրապետյանը, «Արձակ» անվանակարգում՝ Սոնա Գևորգյանը։

Առաջին անգամ Գրքի երևանյան միջազգային փառատոնի և Սարոյան հիմնադրամի բացառիկ համագործակցության շրջանակում սահմանվել է Սարոյանի անվան կարճ պատմվածքի մրցանակ, որի նպատակն անգլերեն գրված կամ անգլերեն թարգմանված կարճ արձակի գնահատումն է։ Մրցույթին մասնակցելու համար դիմել էր 108 գրող 25 երկրից՝ Մալթա, Ռուսաստան, Վրաստան, ԱՄՆ, Միացյալ Թագավորություն, Իսրայել, Նիգերիա, Գերմանիա և այլն։ Սարոյանի անվան կարճ արձակ մրցանակին արժանացել է Լուսինե Խառատյանը։ Մրցանակը հանձնել է «Սարոյան» հիմնադրամի նախագահ Սքոթ Սեդրակյանը։ Անվանակարգի հաղթողը նվեր է ստացել Սարոյանի բնօրինակ նկարներից մեկը։

Գրքի երևանյան միջազգային փառատոնն այս տարի ընդլայնում է աշխարհագրությունը՝ սեպտեմբերի 28-ին այն կանցկացվի Գյումրիում, հոկտեմբերի 4–ին՝ Կապանում։