Քենիայի բնաշխարհը՝ հայ լուսանկարչուհու աչքերով

Հայկական բարեգործական ընդհանուր միությունը հրավիրում է մասնակցելու երիտասարդ լուսանկարիչ Բեռտա Մարտիրոսյանի «Քենիան իմ աչքերով» խորագրով անհատական ցուցահանդեսի բացմանը։

Ցուցահանդեսը ներկայացնում է Քենիայի՝ աշխարհում ամենահարուստ կենսաբազմազանությամբ աչքի ընկնող երկրներից մեկի կենդանական աշխարհի բացառիկ լուսանկարներ։ Բեռտա Մարտիրոսյանի աշխատանքները բացահայտում են վայրի բնության գեղեցկությունը, վարքագիծն ու բազմազանությունը։

Բացման արարողությունը տեղի կունենա ապրիլի 16-ին, ժամը 19:00-ին, ՀԲԸՄ Հայաստանի դահլիճում (Մելիք-Ադամյան 2/2)։ Մուտքն ազատ է։

Ցուցահանդեսը կգործի ապրիլի 16-ից մինչև ապրիլի 20-ը ներառյալ՝ ամեն օր ժամը 10:00-ից մինչև 19:00-ն։

Բեռտա Մարտիրոսյանը վայրի բնաշխարհի լուսանկարիչ է։ Իր աշխատանքներում արտացոլում է վայրի բնաշխարհի գեղեցկությունը, վարքագիծն ու բազմազանությունը՝ միաժամանակ նպաստելով բնապահպանության մասին իրազեկվածությանը։

Բեռտան ակտիվ ներգրավված է վայրի բնաշխարհի վերաբերյալ հետազոտական ու պահպանման ծրագրերում, հատկապես՝ Հայաստանում։ Նա նաև Հայաստանի թռչուններին նվիրված առաջին համապարփակ լուսանկարչական գրքի հեղինակն է և կազմակերպում է թռչնադիտարկման շրջագայություններ, որի ընթացքում նաև ներկայացնում է իր գիտելիքն ու սերն առ բնություն։

Նրա լուսանկարները ցուցադրվել են ավելի քան 20 երկրներում։