Մահացել է երգիչ, երգահան Հայկոն

Մահացել է սիրված երգիչ, երգահան, ՀՀ վաստակավոր արտիստ Հայկ Հակոբյանը, առավել հայտնի Հայկո բեմական կեղծանվամբ։

Երգիչը, 2007 թ. ներկայացրել է Հայաստանը «Եվրատեսիլ» երգի միջազգային մրցույթի ժամանակ և զբաղեցրել 8-րդ տեղը։ 2007 թ., 2010 թ. և 2011 թ. արժանացել է «Տարվա լավագույն կոմպոզիտոր» մրցանակին՝ «Մի վախեցիր», «Սպանված աղավնի», «Խաչագողի հիշատակարանը» ֆիլմերի երաժշտության համար։ Գրել է նաև «Ոչինչ չի մնա», «Հոբելյանական հաճախորդ», «Վանա ծովուն արշալույսը», «Գարեգին Նժդեհ» ֆիլմերի երաժշտությունները։ 2011 թ. Մոսկվայի հայկական երաժշտական «Արմենիա» ամենամյա մրցանակաբաշխության ժամանակ արժանացել է «Տասնամյակի երգիչ» մրցանակին։ 2012 թ. «Արմենիա» հեռուստաընկերությամբ հանդես է եկել՝ որպես «Հայաստանի ձայնը» հեռուստանախագծի երաժշտական պրոդյուսեր։

Նշենք, որ օրեր առաջ Հայկոն վարակվել էր կորոնավիրուսով, և նրա վիճակը ծայրահեղ ծանր էր, բժիշկները պայքարում էին նրա կյանքի համար։

«Ռադիո Հայ ցանցը» հայտնում է իր ցավակցությունը երգչի ընտանիքին և մերձավորներին, նրա հիշատակը միշտ վառ կմնա բոլորիս սրտերում։