Եվա Գևորգյանը Շոպենի անվան 18-րդ մրցույթի եզրափակչում է
Written by Ռադիո Հայ on 18th October 2021
Ռուսաստանը և Հայաստանը ներկայացնող ռուսաստանաբնակ երիտասարդ տաղանդավոր դաշնակահարուհի, մի շարք մրցույթների դափնեկիր Եվա Գևորգյանն անցել է Շոպենի անվան միջազգային 18-րդ մրցույթի եզրափակիչ։
Եզրափակիչ է անցել ընդամենը 12 դաշնակահար աշխարհի 10 երկրից։ Եզրափակչի լսումները կայանալու են հոկտեմբերի 18-20-ը։
Հիշեցնենք, որ մրցույթը մեկնարկել էր հոկտեմբերի 3-ին։ Առաջին փուլում ելույթ էին ունեցել աշխարհի տարբեր երկրներից 87 դաշնակահարներ:
Ֆրեդերիկ Շոպենի անվան դաշնամուրի միջազգային մրցույթն ամենահներից մեկն է աշխարհում: Առաջին մրցույթը տեղի է ունեցել Վարշավայում 1927 թվականին, այնուհետև այն անցկացվել է հինգ տարին մեկ, բացառությամբ Երկրորդ համաշխարհային պատերազմի տարիների։
Մրցույթին կարող են մասնակցել 18-29 տարեկան երիտասարդ երաժիշտներ: Մրցույթի առանձնահատկությունն այն է, որ դրա մասնակիցները կարող են կատարել միայն Շոպենի ստեղծագործությունները: Առաջին փուլում մրցողները ժյուրիին ներկայացնում են էտյուդներ, նոկտյուրներ կատարելու հմտություն, երկրորդում նրանք կատարում են բալլադներ, սկերցոներ և վալսեր, երրորդում` սոնատներ և մազուրկաներ, իսկ եզրափակչում` դաշնամուրի կոնցերտներ:
