Տեղի կունենա երգեհոնային երաժշտության միջազգային փառատոնի փակման գալա համերգը
Written by Ռադիո Հայ on 3rd November 2022
Նոյեմբերի 6-ին Կոմիտասի անվան կամերային երաժշտության տանը տեղի կունենա Վահագն Ստամբոլցյանի անվան երգեհոնի միջազգային փառատոնի փակման գալա համերգը: Համերգին կմասնակցեն երգեհոնահարներ Արմեն Աղաջանյանը, Լուսինե Հարությունյանը, Լուսին Սառաջյանը, Աննա Բակունցը, Կոնստանտին Վոլոստնովը (Ռուսաստան), Հարություն Թագվորյանը և հնագույն երաժշտության «Տաղարան» համույթը (գեղարվեստական ղեկավար և դիրիժոր՝ Սեդրակ Երկանյան): Կհնչեն Գ. Ֆ. Հենդելի վեց երգեհոնային կոնցերտներ: Հայտնում են ՀՀ ԿԳՄՍՆ-ից։
Նշենք, որ փառատոնի շրջանակում կայացել է 12 համերգ, այդ թվում Երևանում՝ Կոմիտասի անվան կամերային երաժշտության տանը և Հայաստանի կոմպոզիտորների միության դահլիճում, ինչպես նաև Չարենցավանի Արամ Խաչատրյանի անվան երաժշտական դպրոցում և Կապանի արվեստի պետական քոլեջում: Փառատոնը մեկնարկել է Կոմիտասի 153-ամյակին նվիրված համերգով:
Փառատոնին մասնակցել են արտերկրի հայտնի երգեհոնահարներ Լադա Լաբզինան (Ռուսաստան), Ֆաբիո Մաչեռան (Իտալիա), Կոնստանտին Վոլոստնովը (Ռուսաստան), Ժան-Պիեռ Սթայվերսը (Նիդեռլանդներ) և Եվգենի Ավրամենկոն (Ռուսաստան): Նկատենք, որ վերջին երկու երգեհոնահարները համերգներով հանդես են եկել նաև Չարենցավանում ու Կապանում:
Հնչել են ինչպես դասական ստեղծագործություններ, այնպես էլ հայկական երաժշտական գոհարների երգեհոնային մշակումներ և հայ հեղինակների ստեղծագործություններ: Կայացել են ծրագրային, այդ թվում՝ Կոմիտասին և Միքայել Թարիվերդիևին նվիրված համերգներ:
