Ֆրանսիական համր կինոյի գլուխգործոցը՝ երևանյան հանդիսատեսին

Մայիսի 5-ին, ժամը 19:00-ին, Հայաստանի ազգային գրադարանի Մեծ դահլիճում կցուցադրվի ֆրանսիացի ռեժիսոր Մարսել Լ’Էրբյեի լեգենդար «Անմարդկային կինը» ֆիլմը։ Ցուցադրությունը կկայանա ֆրանսերենով՝ հայերեն և անգլերեն ենթագրերով։

Ֆիլմը համադրում է գիտական ֆանտաստիկայի և դրամայի տարրերը՝ արտացոլելով 1920-ականների ավանգարդիստական կինոյի և արտ դեկոյի գեղագիտությունը։ «Անմարդկային կինը» համարվում է Լ’Էրբյեի ամենահավակնոտ և սկանդալային աշխատանքներից մեկը, որը թողարկման շրջանում մեծ արձագանք էր առաջացրել Ֆրանսիայում։

Սյուժեի կենտրոնում հայտնի երգչուհի Կլեր Լեսկոտն է, որի դերը մարմնավորում է օպերային դիվա Ժորժետ Լեբլանկը։ Նրա կերպարը ներկայացվում է որպես մեծ տաղանդ ունեցող, սակայն սառն ու անզգա կին։ Իր սիրելիի՝ գիտնական Նորսենի ինքնասպանությունից հետո նա բախվում է սեփական զգացմունքներին և բացահայտում Նորսենի գիտական փորձերը, որոնք վերաբերում են ժամանակի և տարածության օրենքների վերաիմաստավորմանը։

Ցուցադրությունը կազմակերպվում է «Կինոն փոխում է աշխարհը․ Ֆրանսիա 1895–2026» ծրագրի շրջանակում, որը ներկայացնում է ֆրանսիական համր կինոյի գլուխգործոցների և ժամանակակից ֆրանսիացի ռեժիսորների աշխատանքների միջև ստեղծվող երկխոսությունը։ Ծրագիրը նպատակ ունի բացահայտել տարբեր ժամանակաշրջանների արվեստագետների մոտեցումների ընդհանրություններն ու տարբերությունները՝ ընդգծելով կինոյի ազդեցությունը իրականության ընկալման վրա։

Մուտքն ազատ է։