Ռոմանովսկու երաժշտական հրաշքը

«Արամ Խաչատրյան» լեփ-լեցուն համերգասրահում տեղի է ունեցել դաշնակահար Ալեքսանդր Ռոմանովսկու հանդիպումը հայ երաժշտասերների հետ։ Համերգային ծրագրում ընդգրկված էին Սերգեյ Ռախմանինովի ստեղծագործությունները՝ Դաշնամուրի թիվ 3 կոնցերտը և Երկրորդ սիմֆոնիան։

Հայաստանի պետական սիմֆոնիկ նվագախմբի  հասարակայնության հետ կապերի բաժնից հայտնում են, որ Ռոմանովսկին Ռախմանինովի Դաշնամուրի թիվ 3 կոնցերտը նվագում է 16 տարեկանից և Հայաստանում այն ներկայացնում էր առաջին անգամ։ Դաշնակահարը խոստովանում է, որ ամեն անգամ մեծ հաճույքով է այցելում Հայաստան, քանի որ զգում է հանդիսատեսի աներևակայելի հզոր ազդեցությունը, մեծ սերն իր նկատմամբ, և չարձագանքել այդ վերաբերմունքին ինքը չի կարող։

«Բոլոր մարդիկ, որ գալիս են համերգ, ինչ-որ հրաշք են սպասում, իսկ արտիստի խնդիրն այդ հրաշքը բեմում արարելն է»,- ասում է Ռոմանովսկին, ով այդ հրաշքը պարգևել է ունկնդրին իր դյութիչ ու աննկարագրելի երաժշտությամբ, Ռախմանինովի կոնցերտի գեղեցիկ մեկնաբանմամբ։ Բիս և բրավո բացականչությունների ներքո Ռոմանովսկին ներկաներին պարգևեց ևս երկու կատարում։

Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը նշել է, որ Ռոմանովսկին իր և նվագախմբի լավագույն ընկերներից է։ «Ռախմանինովի Դաշնամուրի երրորդ կոնցերտը այն ստեղծագործություններից է, որը կատարելիս երաժիշտները պետք է վստահ լինեն իրենց ուժերի վրա, և բեմում պետք է երևա մենակատարի, նվագախմբի և դիրիժորի արտիստական ընկերությունը։ Ռոմանովսկին այն արտիստներից է, ումից ամեն անգամ բեմում ստանում ես նոր լիցքեր, նոր գաղափարներ, նոր մեկնաբանություններ»,- ասել է դիրիժորը՝ շեշտելով, որ Ալեքսանդր Ռոմանովսկու հետ համագործակցությունը լինելու է շարունակական։

Երեկոյի երկրորդ մասում հնչեց Ռախմանինովի Երկրորդ սիմֆոնիան։
Համերգին ԴասA ծրագրի շրջանակներում ներկա էին նաև Երևանի Մանուել Քաջունու անվան թիվ 54 ավագ դպրոցի աշակերտները։ Ի դեպ, նույն օրը «Արամ Խաչատրյան» համերգասրահում դասական դասաժամ էր անցկացվել աշակերտների համար, որի ընթացքում Ալեքսանդր Ռոմանովսկին աշակերտների առջև հանդես է եկել փոքրիկ մենահամերգով։